上年何韻詩、黃耀明等潮星相繼出櫃；今年五月變性人W上訴得直獲結婚權，同志唔再要匿埋，連帶大專校園都開始有同志蒲面撐自己人。

現就讀港大社會科學系Yr.2的Justino，亦是其中一名出櫃大學生代表，在校內Justino無懼教授及同學白眼，與男友大晒恩愛，facebook又晒咀相，本月同志遊行更高調同男友影互咀海報，呼籲同學上街撐同志。見盡member辛酸的Justino，坦言大專講就open，但歧視同志一樣存在，「你係同志，分分鐘連Hall都冇得住。」

同志平權風近年席捲U界。一年一度的同志大遊行於11月9日（星期六）舉行，以「愛不歧視，高調撐同志」為主題，有超過5,000人參加，打破前四屆的紀錄。今年更特別多U仔撐，共有八間院校加埋至少有近千名學生上街力撐。

身為學生同志組織QSA前主席的Justino都居功不少，佢為了今年大遊行，分別在港大及其他大學擺攤位宣傳，甚至人肉派傳單兼親自做model影互咀海報，呼籲同學參加遊行。遊行當日，Justino仲帶埋男友Moon走在大專遊行隊頭。其間二人不時拖手、自拍、幫對方整頭、抹汗，甚至錫錫，親暱行為毫不忌諱。Justino坦言：「我哋都係做啲異性戀會做嘅嘢，自己都閃縮，大眾點會撐你！」

群星上街

11月9日的香港同志大遊行有超過5,000人參加，是歷屆之冠。演藝界出櫃的黃耀明、吳彤、梁梓禧（原名梁奕倫）、政界直人的陳淑莊都高調撐場，為同志平權出力。

公然錫錫

遊行期間，Justino（左）和Moon（右）公然在大隊中錫錫，仲舉機自拍毫不尷尬，現場更有人鼓掌支持，Justino說：「我哋同其他人一樣，都有權擁抱、拖手同埋錫。」

教授都歧視

早已認清自己性取向的Justino，中學在名校男拔萃就讀，他直言慶幸自己入讀男拔：「可能因為讀男校，校內都有唔少基同學，雖然試過有同學扮我講嘢camp同蘭花手，但大家都玩得好埋，唔會歧視我性取向。」

估唔到入U兩年的Justino指大專界表面就好開放，但實際歧視比中學更嚴重，「讀男拔時，唔少男同志同學會喺學校私下拖手，食飯又會互夾餸畀另一半，佢哋都唔會俾人歧視，但上到大學，除咗男同志變得避忌晒，我仲試過俾同學鬧死基佬，估唔到同學知道你基，連上堂都唔會同你坐，有內地教授仲會特別對我哋唔禮貌，舉手答問題都唔會理我哋，對住我哋會特別黑口黑面（會唔會你對號入座咗啫）全個學期都唔理我，仲藐埋我個同志同學，咁係歧視啦！有同志同學更因為性取向問題，連hall都冇得住。」問到邊間宿舍，Justino就指因港大正處理有關個案，不便多說。

恩愛情侶

雖然Justino和Moon拍拖不足一年，但二人經常出雙入對，更經常在facebook、Instagram大晒恩愛相，同一般男女拖友無異。

同志更專一

曾有幾次同性拍拖經驗的Justino，大讚同志比港女細心得多，更識照顧另一半，甚至更專一：「同性戀男仔好多都比港女好，至少唔會問你有冇車同樓！」

恨帶男友見家長

為同志平權走在最前，雖然成功獲不少同學、朋友力撐，但Justino最希望得到家人支持，「雖然屋企都知我嘅性取向，佢哋冇反對，但亦冇支持，所以到依家都唔敢帶男友返屋企。我都好想同另一半結婚，同家人一齊分享我哋嘅喜悅！」要搵到彩虹，條路仲好遙遠。

男拔撐同志

中學時讀男拔的Justino，指校內都有師兄師弟是同志，雖然是少數一群，但同學之間沒有隔膜，同性戀異性戀一樣玩得好埋，絕對冇歧視。

平權到廣州

咪以為U仔撐同志，淨係會參加吓遊行！除了每年都會有的性文化節外，今年中大、港大、科大、教院等大專院校仲聯手合辦的「Action Q大專同志平權訓練計劃」，除了吹雞撐遊行外，下年仲會搞廣州交流團、跨性別聖誕派對等，U仔想了解多啲同性文化，就記得喺fb打「Action Q大專同志平權訓練計劃」喇！

浸大插旗

為了今次同志遊行，各大專院校都在校園大力宣傳。例如浸大國際學院同學就將代表同志平權的彩虹旗插在學校正門外，鼓勵同學參與遊行。

剛過去的嶺大性別文化節，搵嚟香港女同盟會等組織，及不少跨性人士講talk。而理大仲搵埋紫藤、香港彩虹等組織幫手拍宣傳片，推廣正確同志觀。

Main Camp：

Main Campus簡稱，意即主校園，各大專潮人潮事當然離不開Main Campus。